Typografi

Value Serif Pro blir alltid brukt til overskrifter, og alltid i vekta bold. Dette er ein varm serif med runde detaljar og eit litt organisk preg, som gir designet eit fagleg og imøtekomande uttrykk.

Basis Grotesque Pro blir brukt til brødtekst, og skal alltid nyttast i vekta Medium. Dette er ein rein og funksjonell grotesk med god lesbarheit, som held uttrykket roleg og tilgjengeleg. Medium gir nok tyngde til å stå godt saman med Value Serif Pro Bold, som elles ville fått brødteksten til å verke for spinkel. For utheva tekst blir vekta Black brukt.

Å setje korrekt linjeavstand/linjehøgd kan vere vanskeleg, men er viktig for lesbarheita og totalinntrykket. Ein tommelfingerregel er at di større skrifttypen er, di mindre skal linjeavstanden vere. Her følgjer nokre eksempel på skriftstorleikar og passande linjeavstandar.